கேள்வி-பதில்

சவக்குழி வெட்டிக் கொண்ட காங்கிரஸ்

Sun, 01 Jan 2012 07:58:29 +0100

தனக்காக சவக்குழி வெட்டிக் கொண்ட காங்கிரஸ்

முஸ்லிம்களை முன்னேற்றுவதற்காக மத்திய அரசு உள்ஒதுக்கீடு அளிக்க முடிவு செய்துள்ளது குறித்து தொடர்ந்து கசியவிடப்பட்ட ஊகங்களாலும், மத்திய அமைச்சர் சல்மான் குர்ஷித் கொடுத்த பில்டப்பாலும் ஏதோ நல்ல செய்தி வரப்போகிறது என்ற எதிர்பார்ப்பு முஸ்லிம் சமுதாயத்தில் நாளுக்கு நாள் அதிகமாகி வந்தது.

இதோ வருகிறது அதோ வருகிறது என்று காத்திருந்த அந்த அறிவிப்பு முஸ்லிம் சமுதாயத்துக்குக் கடும் கோபத்தை ஏற்படுத்தும் வகையில் வந்துள்ளது. இந்தியாவில் உள்ள சிறுபான்மை மக்களுக்கு - முஸ்லிம்களுக்கு அல்ல- 4.5 சதவிகிதம் உள் ஒதுக்கீடு வழங்கப்படும் என்பது தான் அந்த அறிவிப்பு.

இந்தியாவில் பல்வேறு சிறுபான்மை மக்கள் இருந்தாலும் முஸ்லிம் சமுதாயம் தான் அனைத்து சிறுபான்மை சமுதாயங்களிலும் அதலபாதாளத்தில் கிடக்கிறது என்று கோபால் சிங் கமிஷன், நீதிபதி ராஜேந்திர சச்சார் கமிஷன், நீதிபதி ரங்கநாத் மிஸ்ரா கமிஷன் ஆகியவை தங்கள் அறிக்கைகளில் தக்க ஆதாரங்களுடனும் புள்ளிவிபரங்களுடனும் குறிப்பிட்டுள்ளனர். இந்த அறிக்கைகள் நாடாளுமன்றத்திலும் வைக்கப்பட்டு அரசால் ஏற்கப்பட்டுள்ளன.

அந்த அறிக்கைக்கும் இந்த உள்ஒதுக்கீட்டுக்கும் சிறிதளவும் சம்மந்தம் இல்லை. நீதிபதி ரங்கநாத் மிஸ்ரா அவர்கள் முஸ்லிம்களுக்கு 10 சதவிகிதமும் மற்ற சிறுபான்மையினருக்கு ஐந்து சதவிகிதமும் தனி இட ஒதுக்கீடு அளிக்க வேண்டும் என்று பரிந்துரைத்திருந்தார். அரசே நியமித்த ஒரு கமிஷனின் பரிந்துரை இந்த அளவுக்கு அலட்சியப்படுத்த முடியுமா என்று நினைக்கும் அளவுக்கு மத்திய அரசின் அறிவிப்பு அமைந்துள்ளது.

தேர்தல் அறிக்கையில் முஸ்லிம்களுக்கு இட ஒதுக்கீடு தருவோம் எனக் கூறி ஆட்சி பீடம் ஏறிய காங்கிரஸ் கட்சி, சிறுபான்மை மக்களுக்கு 4.5 சதம் தருவோம் என்று அப்போதே தெளிவாகக் கூறியிருந்தால் காங்கிரஸை முஸ்லிம்கள் சவக்குழிக்கு அனுப்பி இருப்பார்கள்.

முஸ்லிம்களுக்கு மட்டும் பத்து சதவிகிதம் அளிக்குமாறு மிஸ்ரா கமிஷன் சொல்லி இருக்கும் போது மொத்த சிறுபான்மை மக்களுக்கும் சேர்த்து பதினைந்து சதவிகிதம் என்று அறிவித்திருப்பதை வெந்த புண்ணில் வேல் பாய்ச்சும் நடவடிக்கையாகவே முஸ்லிம் சமுதாயம் கருதுகிறது.

இதில் முஸ்லிம்களுக்குத் தனியாக எந்த அளவும் கூறப்படவில்லை. எந்த சிறுபான்மை மக்கள் மூலமும் இடங்களை நிரப்பிக் கொள்ள இந்த ஒதுக்கீடு வகை செய்கிறது.

பொதுவாக அதிகாரிகள் மனதில் முஸ்லிம் என்றாலே வெறுப்பு விதைக்கப்பட்டுள்ளது. எனவே இந்த நாலரை சதவிகித்திலும் முஸ்லிம்கள் பயனடையக் கூடாது என்று காய் நகர்த்துவார்கள். சோனியாவின் தாய்மதத்தைச் சேர்ந்த் கிறித்தவர்களுக்கும், மன்மோகன்சிங்கின் மதத்தைச் சேர்ந்த சீக்கியர்களுக்கும் தான் இதில் பயன் கிடைக்கும். 4.5 சதவிகிதமும் இவர்களைக் கொண்டே நிரப்பப்படும். மேலும் சிறுபான்மை சமுதாயங்களில் இந்த இரண்டு சமுதாயங்களில் தான் படித்தவர்கள் அதிகமாக உள்ளனர்.

இந்த இட ஒதுக்கீடு இல்லாமல் 27 சதவிகிதம் பொதுவாக இருந்த போது கிடைத்து வந்த இரண்டு அல்லது மூன்று சதவிகிதம் கூட இனி முஸ்லிம்களுக்கு இல்லாமல் போய்விடும் அளவுக்கு காங்கிரஸ் துரோகம் செய்துள்ளது.

முஸ்லிம்கள் தங்களுக்கு என தனி இட ஒதுக்கீட்டைத் தான் கேட்டார்கள். சிறுபான்மை என்ற அடிப்படையில் பலரையும் சேர்த்துக் கொண்டு வழங்கும் போலி தனி இடஒதுக்கீட்டைக் கோரவில்லை. இதற்குத் துரோகம் செய்யப்பட்டுள்ளது.

முஸ்லிம்கள் 20 சதவிகித இட ஒதுக்கீட்டைக் கோரி வந்தார்கள். அந்த அளவுக்கு இல்லாவிட்டாலும் நீதிபதி ரங்கநாத் மிஸ்ரா அவர்கள் பரிந்துரைத்தபடி பத்து சதமாவது கிடைக்கும் என்று முஸ்லிம்கள் அதிக நம்பிக்கை வைத்திருந்தனர். அந்த நம்பிக்கைக்கும் துரோகம் செய்துள்ளது காங்கிரஸ் அரசு.

அதுவும் மறுநாள் ஐந்து மாநில தேர்தலுக்கான தேதிகளை நிர்ணயித்துக் கொண்டு இட ஒதுக்கீடு சட்ட்த்தை காங்கிரஸ் நிறைவேற்றியுள்ளது. முஸ்லிம் சமுதாயம் மறுபரிசீலனை செய்யக் கோரினால் தேர்தல் தேதி அறிவிக்கப்பட்டதால் இனி ஒன்றும் செய்ய முடியாது என்று தட்டிக் கழிப்பதற்காக திட்டமிட்டு நாடகமாடியுள்ளது.

முஸ்லிம்களுக்கு சிறிதும் பயனில்லாத இந்த இட ஒதுக்கீட்டை -முன்னர் இருந்த அளவையும் தட்டிப் பறிக்கும் இந்த இட ஒதுக்கீட்டை - வழங்காமல் இருந்தால் ஐந்து மாநிலத் தேர்தல்களில் ஓரளவு முஸ்லிம்களின் வாக்குகளைப் பெற்றிருக்க முடியும். முஸ்லிம்களின் வாய்ப்புகளைத் தட்டிபறிக்கும் இந்தச் சட்ட்த்தினால் ஐந்து மாநில தேர்தலில் காங்கிரஸ் தனக்குத் தானே சவக்குழி வெட்டிக் கொண்டதாகவே நாம் கருதுகிறோம்.

உணர்வு தலையங்கம்

பால் விலை பஸ்கட்டண உயர்வு சரியா?

Thu, 29 Dec 2011 11:47:17 +0100

கேள்வி: சென்ற சட்டமன்றத் தேர்தலில் AIADMK விலைவாசி உயர்வை முக்கிய காரணம் காட்டி ஓட்டு கேட்டது. இப்போதைய அரசு பால் மற்றும் பேருந்து கட்டணத்தை உயர்த்தி உள்ளது, இதன் பின்னணி என்ன?

- அஹ்மத் ஷமீம், கூத்தாநல்லூர்

தற்போது தமிழக அரசின் பஸ் கட்டணம் மற்றும் பால் விலை ஏற்றம் பற்றி தாங்கள் அறிந்ததே! இதைப் பற்றி தமிழ்நாடு தவ்ஹீத் ஜமாஅத்தின் கருத்து என்ன? மக்கள் நலனுக்காக போராடும் நீங்கள் ஏன் இதற்காகப் போராடக் கூடாது?

- நா.ரஹ்மத்துல்லாஹ், மணலி

விலைவாசி உயர்வை மக்கள் சுமக்க வேண்டும் என்று காரணம் கூறி ஜெயலலிதா அதிரடியான விலை உயர்வை அறிவித்துள்ளார். அதை அவர் நியாயப்படுத்தி இருப்பதை யாரும் ஏற்றுக் கொள்ள முடியாது.

நான் மக்கள் மீது சுமத்தாமல் வேறு யார் மீது சுமத்த முடியும் என்று வாதமும் செய்துள்ளார். இப்படி வாதம் செய்வதற்கு ஒரு முதல்வர் தேவையா? நஷ்டம் வரும்போது விலையை உயர்த்தும் செயலை ஒரு டாட்டா, ஒரு அம்பானி செய்து விடுவாரே? நஷ்டம் வருகிறது என்றால் மக்களைப் பாதிக்காத வகையில் எப்படி நிர்வாகம் நடத்துவது என்பதற்குத்தான் ஒரு முதல்வர் தேவைப்படுகிறார். எனவே ஜெயலலிதா விலையைக் கண்டமேனிக்கு உயர்த்திவிட்டு அதை நியாயப்படுத்துவது மக்களுக்குச் செய்யும் பச்சைத் துரோகமாகும்.

ஆவின் நிறுவனமும் போக்குவரத்துக் கழகங்களும் நஷ்டத்தில் இயங்குகின்றன என்றால் அதற்கான காரணத்தைக் கண்டு பிடித்து சரி செய்வதை விடுத்து மக்களைப் பற்றி கவலைப்படாத அதிகாரிகளின் பேச்சைக் கேட்டு, தானும் ஏமாந்து நாட்டு மக்களையும் ஜெயலலிதா ஏமாற்ற முயன்றுள்ளார்.

போக்குவரத்துக் கழகம் நஷ்டத்தில் இயங்குகிறது என்பதால் பஸ் கட்டண உயர்வு என்கிறார். கட்டண உயர்வினால் போக்குவரத்துக் கழகம் நஷ்டத்தில் இருந்து விடுபடும் என்று ஜெயலலிதா நினைத்தால் அவரை விட ஏமாளி யாரும் இருக்க முடியாது.

இப்போது உயர்த்தப்பட்டதை விட இன்னும் ஒரு மடங்கு கட்டணத்தை அதிகரித்தால் கூட போக்குவரத்துக் கழகத்தை லாபத்தில் நடத்த முடியாது.

கொள்ளை அடிக்கும் அதிகாரிகளும், திமிர் பிடித்த அரசு ஊழியர்களின் போக்கும், பராமரிப்பில்லாத சேவையும்தான் நஷ்டத்துக்குக் காரணம். ஓட்டை உடைசல்களாகவும் மழை பெய்தால் ஒழுகக் கூடியதாகவும், கிழிந்த சீட்டுகளைக் கொண்டதாகவும் எப்போது வேண்டுமானாலும் படுத்து(?) விடும் என்ற நிலையிலும்தான் அரசு பேருந்துகள் உள்ளன. இதனால்தான் 60 பயணிகள் ஏற வேண்டிய பேருந்துகளில் 20 பயணிகள் மட்டுமே பயணிக்கும் நிலை உள்ளது. இதுவே நஷ்டத்துக்கு முக்கிய காரணம்.

அரசு பேருந்தில் 200 ரூபாய் கட்டணம் இருந்தாலும், அதே தொலைவுக்கு தனியார் பேருந்துகள் 300 ரூபாய் கட்டணம் வசூலிக்கின்றன. இருந்த போதிலும் பயணிகள் கூட்டம் தனியார் பேருந்துகளில் நிரம்பி வழிகின்றது. காசுக்கு கணக்கு பார்க்கும் மிகச் சிலர் தவிர மற்றவர்கள் தூய்மைக்காகவும் பாதுகாப்பான பயணத்துக்காகவும் தனியார் பேருந்துகளில் அதிகக் கட்டணம் கொடுத்துப் பயணிக்கின்றனர்.

தனியாரை விட அரசு போக்கு வரத்துக் கழகத்துக்கு டீசல் நான்கு ரூபாய் குறைந்த விலையில் வழங்கப்படுகிறது. அப்படி இருந்தும் நஷ்டம் ஏற்பட இவர்கள் நிர்வாகம் செய்யும் லட்சனம்தான் காரணம்.

இப்போது கட்டணத்தை உயர்த்தி விட்டார்கள். மூளையற்ற அதிகாரிகளின் கணக்குப்படி ஏட்டில்தான் அதிக லாபம் கிடைக்கும். ஆனால் ஏற்கனவே 20 பேர் பயணித்தது போய் இனி அது பத்து பேராகக் குறைந்து மேலும் நஷ்டத்தைத்தான் அதிகரிக்கும்.

பெருநகரங்களில் டவுன் பஸ்களை இயக்க தனியார் நிறுவனங்களுக்கு அனுமதி இல்லாத காரணத்தாலேயே அரசுப் பேருந்துகள் நிரம்பி வழிகின்றன. அதுவும் இனி மேல் சென்னையில் குறைந்து விடும். அனைவரும் மின்சார ரயிலில் பயணம் செய்ய ஆரம்பித்து விட்டனர்.

தொலைதூரம் செல்பவர்களில் காசுக்கு கணக்கு பார்ப்பவர்கள் ரயில் பயணத்தைத் தேர்வு செய்ய ஆரம்பித்து விட்டார்கள். காசைப்பற்றி கவலைப்படாதவர்கள் வழக்கம்போல் தனியார் பஸ்களில் தான் பயணம் செய்வார்கள். இனி பயணிகளே இல்லாத வெறும் பஸ்களைத்தான் அரசாங்கம் இயக்க வேண்டும். இது ஏற்கனவே இருந்த நஷ்டத்தை மேலும் அதிகமாக்குமே தவிர போக்குவரத்துக் கழகத்தை தூக்கி நிறுத்தாது.

அடுத்து பால் வளத்துறையும் இப்படித்தான். ஊழல் பெருச்சாளிகளாலேயே நஷ்டம் ஏற்படுகிறது. வாங்கிய விலையை விட அதிக விலைக்கே பால் விற்கப்பட்டு வருகின்றது. இதில் லாபம்தான் ஏற்பட வேண்டும். ஆனாலும் தொடர்ந்து நஷ்டம் ஏற்படுகிறது என்றால் அதற்குக் காரணம் சில திருட்டு அதிகாரிகளே!

மின்சாரம் மட்டுமே உற்பத்தி விலையை விடக் குறைந்த விலையில் மக்களுக்கு வழங்கப்படுகிறது. இதில் மட்டும் நஷ்டம் ஏற்படலாம். ஆனாலும் மக்களுக்கு மிகவும் அத்தியாவசியம் என்பதால் அரசாங்கம் அந்த நஷ்டத்தைச் சுமந்து கொள்கிறது. மேலும் மின் கட்டணத்தை அதிகரித்தால் மற்ற பொருள்களின் விலை உயர்ந்து விடும் என்பதால் அரசாங்கம் அதைச் சுமக்கத்தான் வேண்டும். இது காலாகாலம் கடைப்பிடிக்கப்படும் நடைமுறையாகும்.

ஆனாலும் இந்த நஷ்டம் கூட பாதியளவுதான் மக்களுக்கு வழங்கும் சலுகையால் ஏற்படுகிறது. இன்னொரு பாதி அதிகாரிகள், ஊழியர்கள் மற்றும் ஆட்சியாளர்களின் பொறுப்பற்ற தன்மையால் ஏற்படுவதாகும்.

சென்னையில் பகல் பன்னிரெண்டு மணிக்குப் பார்த்தால் தெருவிளக்குகள் எரிந்து கொண்டிருக்கும். ஏனெனில் குறித்த நேரத்தில் போட்டு குறித்த நேரத்தில் அணைப்பதில்லை. அதுபோல் அதிகாரிகளுக்கு லஞ்சம் கொடுத்து பெரிய பெரிய நிறுவனங்கள் பத்தாயிரம் யூனிட்டைச் செலவிட்டு ஆயிரம் யூனிட்டுக்கு பணம் செலுத்துவதும் தொடர்ந்து நடக்கிறது. அது மட்டுமில்லாமல் ஆளும் கட்சியினர் நடத்தும் விழாக்களுக்கும் மாநாடுகளுக்கும் கொக்கி போட்டு பல்லாயிரம் யூனிட்டுகள் திருடப்படுகின்றன.

இப்படிப்பட்ட ஊதாரித்தனத்தைக் குறைத்தால் விலை ஏற்றாமலே பாதி நஷ்டத்தைக் குறைக்க முடியும். மற்றொரு பாதி நஷ்டத்தை அரசாங்கம் சுமக்கத்தான் வேண்டும். வேறு வகையில் அதற்கான நிதிகளைப் பெருக்கிக் கொள்ள வேண்டும்.

வர்த்தக நோக்கத்தில் நடப்பதற்கு ஒரு அரசாங்கம் தேவையில்லை வியாபாரிகள் போதும். அரசாங்கம் இலவச மருத்துவமனை நடத்துகிறது. இதை நடத்த கஷ்டமாக உள்ளதால் இனிமேல் கட்டணம் வசூலிப்போம் என்று சொல்லலாமா?

காவல் துறையினருக்கு சம்பளம் கொடுக்க முடியவில்லை, இனி மேல் புகார் கொடுக்க இவ்வளவு கட்டணம், எப்.ஐ.ஆர் போட இவ்வளவு கட்டணம் என்று கேட்க முடியுமா?

மக்களாகிய நீங்கள்தான் சுமக்க வேண்டும் என்று திமிர் வாதம் பேசமுடியுமா? மக்கள் ஏன் சுமக்க வேண்டும்? மக்கள்தான் சுமக்க வேண்டும் என்றால் ஆட்சி எதற்காக?

உணர்வு 16:13

முஸ்லிம் நாடுகளில் புரட்சிகள் ...

Thu, 29 Dec 2011 11:46:42 +0100

கேள்வி: உலக இஸ்லாமிய நாடுகளில் அடுத்தடுத்த அதிபர்கள் அரசுகள் மாற்றப்பட்டு உள்நாட்டுப் புரட்சிகள் ஏற்பட என்ன காரணம்?

- அபூஜஸீம் ஸார்ஜா

பொதுவாக மனிதர்கள் சுதந்திரத்தை விரும்பக் கூடியவர்களாக உள்ளனர். அரசாங்கம் எவ்வளவு நல்லதாக இருந்தாலும் அதன் தவறுகளைச் சுட்டிக்காட்டவும் தேவைப்பட்டால் அந்த ஆட்சியை மாற்றவும் நமக்கு உரிமை வேண்டும் என விரும்புகிறார்கள். கருத்துச் சுதந்திரமும், ஆட்சியாளர்களை மாற்றும் அதிகாரமும் மக்களிடம் வழங்கப்பட்டுள்ள நாடுகளில் இதுபோல் புரட்சி நடப்பதில்லை.

எழுத்தாலும் பேச்சாலும் அரசின் தவறுகளைச் சுட்டிக் காட்டும் வாய்ப்பு இருந்தால் அவர்களின் கோபத்துக்கு அது வடிகாலாக ஆவதால் புரட்சிக்கு வேலை இல்லை.

மேலும் ஜனநாயக நாடுகளில் ஆட்சியாளர்கள் மோசமானவர்கள் என்றால், அடுத்த தேர்தலில் ஆட்சியை மாற்ற முடியும் என்பதால் பொறுமையுடன் காத்திருக்கிறார்கள்.

ஆனால் முஸ்லிம் நாடுகளில் கருத்து சுதந்திரம் இல்லை. ஆட்சியாளர்களை மாற்றும் அதிகாரமும் மக்களுக்கு இல்லை எனும்போது அடக்கி வைக்கப்பட்ட கோபம் ஒரு நேரத்தில் பொங்கி விடுகிறது.

இந்தியாவில் இந்திரா காந்தி அவசர நிலைப் பிரகடனம் செய்த போது லஞ்சம், கலப்படம், ஊழல் அனைத்தும் கட்டுக்குள் வந்தன. அரசு அலுவலர்கள் விரைவாக தங்கள் கடமையைச் செய்தனர். விலைவாசியும் கட்டுப்பாட்டுக்குள் இருந்தது. ஆனால் கருத்துச் சுதந்திரம் மட்டும் இல்லை. இதன் காரணமாக இந்திரா காந்தி படுதோல்வியைச் சந்தித்தார். மக்கள் சுதந்திர உணர்வைத்தான் பிரதானமாகக் கருதுகிறார்கள் என்பதை இதில் இருந்து அறிந்து கொள்ளலாம்.

உணர்வு 16:14

முஸ்லிம் நாடுகள் அமெரிக்காவுக்கு ...

Thu, 29 Dec 2011 11:46:12 +0100

கேள்வி: “உலக மகா ரவுடி, கொள்ளைக்கார நாடான அமெரிக்கா” தீவிரவாதத்தை ஒடுக்குகிறோம் என்ற பெயரில் ஈராக், ஆப்கானிஸ்தான் போன்ற முஸ்லிம் நாடுகளில் மக்களை கொன்று குவித்துக் கொண்டுள்ளது. அதன் தொடர்ச்சியாக “ஈரானையும்” ருசி பார்க்க துடிக்கிறதே? இதை மற்ற முஸ்லிம் நாடுகள் கண்டிக்காதது ஏன்? அமெரிக்காவை எதிர்த்துப் போராடி வெற்றி பெற ஈரானுக்குத் திறமை உள்ளதா?

- முகம்மது அபுபக்கர் சித்தீக், ஷிமோகா, கர்நாடகா.

உலகின் வலிமையான ஒரே நாடாக இன்று அமெரிக்கா உள்ளது. அமெரிக்காவைப் பகைத்துக் கொண்டால், ஏதாவது புளுகு மூட்டைகளை அவிழ்த்து விட்டு அந்த நாட்டைச் சூறையாடும் கொள்ளைக்கார நாடாக அமெரிக்கா இருப்பதாலும், கொள்ளை அடிப்பதில் வீசப்படும் எலும்புத் துண்டுக்காக பிரிட்டன் உள்ளிட்ட நேசநாடுகள் துணை நிற்பதாலும் முஸ்லிம் நாடுகள் மட்டுமின்றி உலகின் அனைத்து நாடுகளும் அமெரிக்காவுக்கு அஞ்சுகின்றன.

உலகில் எந்த நாடும் அமெரிக்காவுடன் மோதி வெல்ல முடியாது என்பதுதான் இன்றைய நிலைமை.

ஈரான் என்ன? சீனாவாக இருந்தாலும் ரஷ்யாவாக இருந்தாலும் அமெரிக்காவைப் போரில் வெல்ல முடியாது என்பதுதான் எதார்த்தம்.

எந்த நாட்டுடன் அமெரிக்கா சண்டை நடத்துவதாக இருந்தாலும் அந்த நாட்டை மிகப்பெரிய சக்தியாக முதலில் சித்தரித்துக் காட்டும். ஒன்றுமில்லாத பலவீனமான நாட்டுடன் போர் செய்வதை உலகம் கேவலமாக்க் கருதக் கூடாது என்பதற்காக அமெரிக்காவுக்கு நிகரான சக்தியாக பலவீனமான நாட்டை பிரம்மாண்டமாக்கிக் காட்டும். அமெரிக்காவே நம்மைப் பார்த்து பயப்படுகின்றது என்ற இறுமாப்பை அந்த நாட்டுக்கு ஏற்படுத்திவிட்டு தனக்குச் சமமான எதிரியுடன் போரிடுவது போன்ற தோற்றத்தை ஏற்படுத்தி அந்த நாட்டை வெற்றி கொள்ளும்.

சதாம் உசேனை இப்படித்தான் அமெரிக்காவுக்கு சரியான போட்டியாளராகச் சித்தரித்துக் காட்டிய பிறகே இராக்கை அழித்தது. உண்மையில் அன்றைய இராக்கை இலங்கை கூட வென்று விடும் அளவுக்கு பலவீனமாக இருந்தது. துருப்பிடித்த ராணுவ விமானம் கூட இல்லாத இராக்கை மிகப்பெரும் நாசகார ஆயுதங்கள் வைத்துள்ளதாகக் காட்டி அதை ஒழித்து விட்டதாக பெருமைப்பட்டுக் கொண்டது அமெரிக்கா.

ஆனால் வியட்நாம், ஆப்கான், ஈராக் என அமெரிக்கா நடத்திய ஒவ்வொரு போருக்குப் பிறகும் அதன் பொருளாதார பலம் குறைந்து வருகிறது. ஈரானுடன் இன்னொரு போர் நடந்தால் மேலும் பொருளாதாரப் பாதிப்பு ஏற்படும் என்பதால்தான் அமெரிக்கா வெற்று எச்சரிக்கை விடுகிறதே தவிர போரில் தோல்வி ஏற்படும் என்ற அச்சத்தினால் அல்ல!

அமெரிக்கா மேலும் மேலும் பலவீனப்படும்வரை அல்லது அமெரிக்காவுக்கு நிகராக அதை மிஞ்சக்கூடிய இன்னொரு வல்லரசு உருவாகும்வரை இதுதான் நிலைமை. எனவே முஸ்லிம் நாடுகள் இதை உணர்ந்து மவுனம் சாதிப்பதைக் குறை கூறக்கூடாது.

தங்கள் நாட்டைப் பாதுகாப்பதற்காக பல சந்தர்ப்பங்களில் அமெரிக்காவைக் கண்டிக்க இயலாத நிலை முஸ்லிம் நாடுகளுக்கு ஏற்படுவதுண்டு. உணர்ச்சி வசப்படும் சிலரது விருப்பத்துக்காக தங்கள் நாட்டை இன்னொரு இராக்காக ஆக்கக் கூடாது என்ற எச்சரிக்கை உணர்வுதான் இதற்குக் காரணம். அந்த இடத்தில் நீங்களோ நாமோ இருந்தாலும் அந்த முடிவைத்தான் எடுக்க முடியும்.

தனிப்பட்ட வாழ்க்கையிலும் எதிரியின் பலத்தைக் கருத்தில் கொண்டு இது போன்ற முடிவுகளை நாமும் எடுக்கத்தான் செய்கிறோம். சதாம் உசேன் போல் நிஜாதியும் ஏமாந்து விடக்கூடாது என்பதே நமது விருப்பம்.
உணர்வு 16:14

அரபு மொழிதான் சிறந்த மொழியா?

Thu, 29 Dec 2011 11:45:49 +0100

கேள்வி: உலகிலேயே தமிழ் மொழி தான் முதல் மொழி அதுதான் சிறந்த மொழி என்று தமிழர்களும், திருக்குர்ஆன் அரபி மொழியில் இருப்பதால் அரபி மொழிதான் உலகில் சிறந்த மொழி என்று முஸ்லிம்களும் கூறி வருகின்ற நிலையில் எந்த மொழி, முதல் மொழி? எந்த மொழி சிறந்த மொழி? என்பதை விளக்கவும்.

- இப்ராஹிம்ஷா, காவக்காரன்பட்டி (நாமக்கல்)

இஸ்லாத்தின் பார்வையில் எந்த மொழியும் இன்னொரு மொழியை விட சிறந்த மொழி அல்ல. எல்லாம் சமமான தரத்தில் உள்ளவை தான்.

குர்ஆனை இறைவனிடமிருந்து பெற்று மக்களிடம் கொண்டு செல்வதற்கு இறைவன் முஹம்மது நபி (ஸல்) அவர்களை இறைத்தூராக நியமித்தான். முஹம்மது (ஸல்) அவர்களுக்கு அரபு மட்டுமே தெரியும். எனவே அரபுமொழியில் குர்ஆன் அருளப்பட்டது.

உலகில் உள்ள மொழிகளில் இறைவனுக்குப் பிடித்தமான மொழி அரபுமொழிதான் என்ற காரணத்திற்காக அரபுமொழியில் குர்ஆன் அருளப்படவில்லை. மாறாக இந்தக் குர்ஆனை மக்களிடம் கொண்டு செல்ல ஏதாவது ஒரு மொழி தேவைப்படுகிறது என்ற அடிப்படையில்தான் அரபுமொழியில் குர்ஆன் அருளப்பட்டது.

எந்த மொழியில் குர்ஆனை இறக்கினாலும் மற்றமொழி பேசுபவர்கள் ஏன் எங்கள் மொழியில் குர்ஆன் அருளப்படவில்லை என்று கேள்வி கேட்கத்தான் செய்வார்கள். தமிழ் மொழியில் குர்ஆன் அருளப்பட்டிருந்தால் ஆங்கில மொழி பேசுபவர்கள் ஆங்கிலத்தில் குர்ஆன் ஏன் அருளப்படவில்லை என்று கேட்பார்கள்.

இஸ்லாத்தில் ஒரு குறிப்பிட்ட மொழிக்கு எந்த மதிப்பும் கிடையாது.

நபிகள் நாயகம் (ஸல்) அவர்கள் கூறினார்கள்:

அரபு அல்லாத வேறுமொழி பேசுபவரை விட அரபு மொழி பேசுபவருக்கு எந்தச் சிறப்பும் இல்லை. அரபு மொழி பேசுபவரை விட அரபு அல்லாத வேறு மொழி பேசுபவருக்கு எந்தச் சிறப்பும் இல்லை.

நூல் : அஹ்மது (22391)

ஒவ்வொரு சமுதாயத்துக்கும் இறைத்தூதர்களை அனுப்பியதாக அல்லாஹ் கூறுகிறான்.

நற்செய்தி கூறுபவராகவும், எச்சரிக்கை செய்பவராகவும் உண்மையுடன் உம்மை நாம் அனுப்பினோம். எந்த ஒரு சமுதாயமானாலும் எச்சரிக்கை செய்பவர் அவர்களுக்கு வராமல் இருந்ததில்லை.

திருக்குர்ஆன் 35 : 24

எந்த ஒரு தூதரையும் அவர் தமது சமுதாயத்திற்கு விளக்கிக் கூறுவதற்காக அச்சமுதாயத்தின் மொழியிலேயே அனுப்பி னோம். தான் நாடியோரை அல்லாஹ் வழிகேட்டில் விட்டு விடுகிறான். தான் நாடியோருக்கு நேர்வழி காட்டுகிறான். அவன் மிகைத்தவன்; ஞானமிக்கவன்.

திருக்குர்ஆன் 14:4

எனவே எல்லா மொழி பேசக்கூடிய மக்களுக்கும் இறைத்தூதர்கள் அனுப்பப்பட்டு இருக்கின்றார்கள். அவரவரது மொழிகளில் அம்மக்களுக்கு இறைவேதங்கள் வழங்கப்பட்டிருந்தன என்பதை இதன் மூலம் அறிந்துகொள்ள முடிகின்றது.

உணர்வு 16:14

தேசியக்கொடிக்கு எழுந்து நின்று ...

Thu, 29 Dec 2011 11:45:21 +0100

கேள்வி: நாம் வந்தேமாதரம் பாடல், இணைவைத்தல் என்பதால் புறக்கணிக்கிறோம், ஆனால், தேசிய கீதம் பாடும் போது எழுந்து நிற்கிறோம். தேசிய கொடிக்கு மரியாதை செலுத்துகிறோம். இது சரியா? இப்படிச் செய்வது சுயமரியாதைக்கும், யாருக்கும் எழுந்து நிற்க கூடாது எனும் நபி மொழிக்கும் மாற்றமாக அமையுமா?

- ஆரிப் ராஜா, மங்களம் பேட்டை.

அல்லாஹ்வின் படைப்பில் சிறந்து விளங்கும் மனிதன் அவனை விட மதிப்பில் குறைந்த எதற்கும் மரியாதை செய்ய இஸ்லாத்தில் இடமில்லை.

பாட்டுக்கும் கொடிக்கும் மரியாதை செய்வதில் தேசபக்தி இல்லை. தேசத்தின் சட்ட திட்டங்களுக்குக் கட்டுப்பட்டு நடப்பதும் தேசத்துக்கு ஆபத்து வரும் போது தேசத்தைக் காக்க போராடுவதும் தான் உண்மையான தேசபக்தியாகும். இது தான் இஸ்லாத்தின் பொதுவான சட்டமாகும்.

ஆனாலும் எந்த நாட்டிலாவது இது போன்ற காரியங்களைச் செய்யாமல் இருப்பது குற்றம் என்று அறிவிக்கப்பட்டு அதை மீறினால் நமக்குத் துன்பம் நேரும் என்ற நிலை இருந்தால் அதை நமக்குத் தாங்கிக் கொள்ள இயலாத நிலை இருந்தால் அப்போது அதைச் செய்வது இறைவனால் மன்னிக்கப்படும். சக்திக்கு உட்பட்டு நடக்குமாறு தான் இஸ்லாம் நமக்கு கட்டளையிட்டுள்ளது.

முஸ்லிம்கள் நூலகங்களை அழித்தார்களா?

Thu, 29 Dec 2011 11:44:52 +0100

கேள்வி: அண்ணா நூலகம் மாற்றம் குறித்த முதல்வரின் அறிக்கைக்கு விமர்சனம் எழுதிய ஒரு வாரஇதழ் "பண்டைய இந்தியாவின் அறிவுச் சுரங்கமான நாலந்தா நூலகத்தை அழித்து இன்றும் நினைவு கூறப்படும் முஹம்மது பின் பக்தியார் கில்ஜி" யை போல ஜெயலலிதாவும் நினைவுகூறப்படுவார் என்று விமர்சித்து உள்ளார்கள், இது உண்மையா?

- அஹ்மத் ஷமீம், கூத்தாநல்லூர்

அந்த வார இதழைப் படிப்பதற்கு முன்னர் முஹம்மத் பின் பக்தியார் கில்ஜி என்ற பெயரை யாரும் அறிந்திருக்கவில்லை. நூலகத்தை அழித்த்தற்காக நினைவு கூறத்தக்க பெயராகவும் இது இருக்கவில்லை.

ஒரு நாட்டை வெற்றி கொள்ளும் போதும் ஒரு கட்சியை வெற்றி கொள்ளும் போதும் ஒரு கலாச்சாரத்தை வெற்றி கொள்ளும் போதும் வென்றவர்கள் இது போல் நூலகங்களை அழித்து தங்களின் முழு வெற்றியை உறுதி செய்வது காலாகாலம் நடக்கக் கூடிய ஒன்று தான்.

மனிதகுல வரலாற்றில் இது போல் ஆயிமாயிரம் நிகழ்வுகள் நடந்துள்ளன. இந்தச் செயலுக்காக முஹம்மத் பின் பக்தியார் என்ற பெயர் நினைவு கூரப்படும் அளவுக்கு இருக்கவில்லை.

எந்தக் கெட்ட செயலுக்கு உதாரணம் காட்டுவதாக இருந்தாலும் அதற்கு ஏதாவது ஒரு முஸ்லிமைத் தேடிப்பிடித்து உதாரணம் காட்டும் பார்ப்பன நரித்தனம் தான் இது போன்ற சொற்பிரயோகம்.

ஒருவன் தேசத் துரோகம் செய்தால் அதற்கு உதாரணம் காட்ட 99 சதவிகித உயர்சாதியினர் இருந்தாலும் யாராவது ஒரு முஸ்லிம் இப்படிப்பட்ட செயலில் ஈடுபட்டுள்ளானா என்று தேடிப்பிடித்து ஒரு சமுதாயத்தையே இழிவுபடுத்தும் போக்குக்கு இன்னொரு உதாரணமே இது.
உணர்வு 16:16

பரேலவிகளும் தேவ்பந்திகளும் உங்களை ...

Thu, 29 Dec 2011 11:44:21 +0100

கேள்வி: ஒரு தனியார் மாத இதழில் வேலூர் பாகியாத் அரபி கல்லூரிக்கும் காஷிபுல் ஹூதா அரபிக் கல்லூரிக்கும் நடக்கும் பனிப்போரில் உங்களையும் இணைத்து கூறியுள்ளார்களே, உண்மை நிலவரம் என்ன?

- அஹ்மத் ஷமீம், கூத்தாநல்லூர்

தவ்ஹீத் ஜமாஅத்தையோ அல்லது என்னையோ யார் நன்றாக எதிர்க்கிறார்கள் என்ற போட்டி புதியது அல்ல. பல ஆண்டுகளாக நாம் பார்த்து வரக்கூடிய நிலை தான்.

பரேலவிக் கூட்டத்தின் பத்திரிகைகள், நாங்கள் தான் பீஜேயையும் தவ்ஹீத் ஜமாஅத்தையும் எதிர்க்கிறோம், காஷிபுல் ஹுதா சரியாக எதிர்க்கவில்லை எனக் கூறுகிறது.

தேவ்பந்தி பத்திரிகையோ நாங்கள் தான் ஆரம்பம் முதல் பீஜேயையும் தவ்ஹீத் ஜமாஅத்தையும் சரியாக எதிர்த்து வருகிறோம். இந்த விஷயத்தில் எங்களை மிஞ்ச முடியாது என்று பெருமை அடிக்கிறது.

நம்மை எதிர்ப்பதில் போட்டி போடுவது தான் தங்களின் வளர்ச்சிக்கான வழி என்று இவர்கள் கணக்குப் போட்டால் இவர்கள் கனவுலகில் வாழ்கிறார்கள் என்பது உறுதி.

நாங்கள் தான் தவ்ஹீத் ஜமாஅத்தை எதிர்ப்பதில் முன்னணி எனக் கூறிய பலர் இப்போது இருக்கும் இடம் தெரியாமல் போய்விட்டனர்.

அந்த இடத்துக்குத் தான் அடுத்தடுத்து போட்டி நடக்கிறது. மக்கள் எல்லோரும் தவ்ஹீத் ஜமாஅத்துக்கு எதிராக ஒன்று திரண்டுள்ளது போலவும் தவ்ஹீத் ஜமாஅத்தை நாம் எதிர்த்தால் அந்த பெரும்பான்மை மக்களை நாம் வசமாக்கிக் கொள்ளலாம் எனவும் இவர்கள் தப்புக் கணக்கு போடுகின்றனர்.

இதனால்தான் தொடர்ந்து இவர்கள் ஏமாந்து வருகின்றனர்.

உண்மையில் சொல்லப்போனால் தவ்ஹீத் ஜமாஅத்திலும் பரேலவிசத்திலும் தேவ்பந்தியிசத்திலும் இன்னும் வேறு எதிலும் சேராதவர்கள் தான் மெஜாரிட்டியாக உள்ளனர். இவர்கள் சுன்னத் ஜமாஅத்தின் பின்னே போக மாட்டார்கள்.

அடுத்தபடியாக தவ்ஹீத் ஜமாஅத்துக்குத் தான் அதிக உறுப்பினர்களும் அதிக ஆதரவாளர்களும் உள்ளனர்.

தவ்ஹீத் ஜமாஅத்துக்கு எதிரானவர்கள் தான் மைனாரிட்டியாக உள்ளனர்.

எதிலும் சேராதவர்களை இவர்கள் தங்களின் ஆதரவாளர்களாக எண்ணிக் கொண்டு அவர்களை எப்படி தங்கள் பக்கம் வளைப்பது என்று போட்டி போடுகிறார்கள்.

பல மாநாடுகள் மூலம் தவ்ஹீத் ஜமாஅத் தனது ஆதரவுத் தளத்தை நிரூபித்துள்ளது. மற்றவர்களோ ஆடையில் அழுக்குப்படாதவர்களை மட்டும் கூட்டி வைத்துக் கொண்டு பெரிய சக்தியாக எண்ணிக் கொண்டிருக்கிறார்கள்.

உணர்வு 16:16

பாலியல் கல்வி தேவையா?

Thu, 29 Dec 2011 11:43:53 +0100

கேள்வி: 'பாலியல் கல்வி' தேவைதானா....? நம் மார்க்கம் அது பற்றி என்ன சொல்கிறது?

- பருத்தி இக்பால், மேலப்பாளையம்

எல்லாவற்றையும் மனிதனுக்குக் கற்றுக் கொடுக்க வேண்டிய அவசியம் இல்லை. யாரும் கற்றுக் கொடுக்காமலே மனிதன் தானாகக் கற்றுக் கொள்ளும் விஷயங்களில் பாலியல் முதலிடத்தில் உள்ளது.

மேலும் இது அனைவருக்கும் ஒரே வயதில் தேவைப்படாது. அவர்களின் உடற்கூறையும் ஆசைகளையும் பொருத்து இது ஆளுக்கு ஆள் வேறுபடும்.

ஒரு பெண்ணுக்கு 13 வயதில் இது போன்ற விஷயங்களில் ஆர்வம் வருவதால் அனைத்து பெண்களுக்கும் அதையே நிர்ணயிக்க இயலாது.

அவரவருக்கு எப்போது தேவைப்படுமோ அப்போது அவர்களின் வயது அதைக் கற்றுக் கொடுத்து விடும்.

மேலும் பாலியல் கல்வி என்று வரும் போது ஆண் ஆசிரியர், ஆண்களுக்கும் பெண்களுக்கும் சொல்லிக் கொடுக்கும் போது மாணவிகளை தங்களின் ஆசைக்கு வீழ்த்தும் நிலை ஏற்படும்.

பெண் ஆசிரியைகள் ஆண்களுக்கு சொல்லிக் கொடுக்க முடியாத நிலை ஏற்படும். கோ எஜுகேசன் அமுலில் உள்ள நிலையில் இது பல விபரீதங்களை ஏற்படுத்தும்.

மிருகங்கள் கூட யாரும் கற்றுக் கொடுக்காமல் அறிந்து கொள்ளும் விஷயம் இது. இதற்கு எந்தக் கற்பித்தலும் தேவை இல்லை.

உணர்வு 16:16

தங்கம் விலை உயர்ந்து வருவது ...

Thu, 29 Dec 2011 11:43:23 +0100

கேள்வி: தங்க விலை கிடுகிடு என உயர்ந்து வரும் இந்த நேரத்தில் மக்களுக்கு நீங்கள் சொல்லும் அறிவுரை என்ன?

- அபூ ஜஸீம் ஜாபர் அலி, சார்ஜா

பல விஷயங்களில் நல்ல ஆலோசனைகளை மக்கள் கேட்கக் கூடியவர்களாக இருந்தாலும் சில விஷயங்களில் அவர்கள் யாருடைய ஆலோசனையையும் கேட்க மாட்டார்கள்.

அதில் முதலிடத்தில் தங்க நகை மீதுள்ள மோகம் உள்ளது.

உலக நாடுகளில் இந்தியர்களை விட வசதியானவர்கள் அதிகம் உள்ளனர். அவர்களில் யாரும் இந்தியப் பெண்கள் போல் நகை மோகம் கொண்டு அலைவதில்லை.

நமது பெண்களின் இந்த மோகத்தை அடிப்படையாகக் கொண்டு தான் ஆன்லைன் மூலம் தங்கத்தை வாங்கி வைத்துக் கொண்டு நாளுக்கு நாள் நிமிடத்துக்கு நிமிடம் விலையை ஏற்றிக் கொண்டு உள்ளனர். இந்த மோகம் குறைய வேண்டும் என்பது தான் நாம் சொல்லும் ஒரே அறிவுரை.

நகைகள் அணிவது தான் பெண்களுக்கு ஒரே இலக்கணம் என்ற நிலை மாறித்தான் ஆக வேண்டும். ஆனால் யாரும் இதைக் கேட்க மாட்டார்கள்.
உணர்வு 16:16